រដ្ឋលេខាធិការក្រសួងមួយនិងមន្ត្រីតំណាង World Bank រងការចោទថាស៊ីសំណូកក្នុងគម្រោងជួសជុលផ្លូវ – The Cambodia Daily Khmer

By Pune Media On Jan 2, 2025

រដ្ឋលេខាធិការក្រសួងសាធារណការ និងដឹកជញ្ជូនឈ្មោះ ផេង សុខវិច្ចនូ រួមជាមួយមន្ត្រីតំណាងធនាគារពិភពលោក (World Bank) ឈ្មោះ ប៊ុន វាសនា រងការចោទប្រកាន់ថាបានទទួលលុយសំណូកពីក្រុមហ៊ុន ប៉ូលី ចិន្តា ជាង ១លានដុល្លារអាមេរិក ជាថ្នូរទទួលបានគម្រោងថែទាំ និងជួសជុលកំណាត់ផ្លូវជាតិលេខ៤។

ប្រភពពីមន្ត្រីជាន់ខ្ពស់នៃក្រសួងសាធារណការ និងដឹកជញ្ជូន សរសេរលិខិតមកកាន់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៣១ ធ្នូ នេះថា លោក ផេង សុខវិច្ចនូ ជាប្រធានគម្រោងកញ្ចប់ទី៤ ក្នុងការថែទាំ និងជួសជុលផ្លូវជាតិលេខ៤ និងលោក ប៊ុន វាសនា តំណាងធនាគារពិភពលោក គឺជាអ្នកមានសិទ្ធិចាត់ចែងកញ្ចប់ថវិកាទី៤ លើគម្រោងជួសជុលផ្លូវជាតិលេខ៤ នេះ។

ប្រភពដដែលថា ការដេញថ្លៃនេះគឺជាការរៀបចំរបស់លោក ផេង សុខវិច្ចនូ និងលោក ប៊ុន វាសនា ទាំងអស់ ខណៈបុគ្គលទាំងពីររូបនេះបានត្រូវរ៉ូវគ្នាជាមួយក្រុមហ៊ុន ប៉ូលី ចិន្តា ក្រោយទទួលបានសំណូកជាង ១លានដុល្លារសហរដ្ឋអាមេរិកទៅហើយនោះ។

គួរបញ្ជាក់ថា ក្រុមហ៊ុន ប៉ូលី ចិន្តា ឬ ប៉ូលី ចាងដា ជាក្រុមហ៊ុនទទួលម៉ៅការខាងវិស្វកម្មសំណង់ស៊ីវិលដែលទំនងជាមានចូលហ៊ុនគ្នាពីក្រុមហ៊ុនរដ្ឋចិន។

មន្ត្រីទាំងនេះបន្តថា ក្នុងចំណោមក្រុមហ៊ុនទាំង១៤ ដែលបានដាក់ឯកសារដេញថ្លៃលើគម្រោងកញ្ចប់ទី៤ នេះ គឺមានតែក្រុមហ៊ុនចំនួន៤ ប៉ុណ្ណោះដែលបានលួចបើកកញ្ចប់ដេញថ្លៃរបស់ក្រុមហ៊ុនទាំង ១០ ផ្សេងទៀតជាសម្ងាត់ ដើម្បីឱ្យពួកគេអាចដាក់កញ្ចប់ដេញថ្លៃខ្ពស់ជាងក្រុមហ៊ុនទាំងនោះ ហើយក្រុមហ៊ុនទាំង ៤ នេះ គឺសុទ្ធសឹងតែក្រុមហ៊ុនបុត្រសម្ព័ន្ធរបស់ក្រុមហ៊ុន ប៉ូលី ចិន្តា ទាំងអស់ ចំណែកឯក្រុមហ៊ុន ១០ ផ្សេងទៀត ត្រូវបានប្រកាសថាជាក្រុមហ៊ុនមិនគ្រប់លក្ខណៈបច្ចេកទេសដូចគ្នា។

ប្រភពមន្ត្រីក្រសួងសាធារណការ អំពាវនាវឱ្យអង្គភាពប្រឆាំងអំពើពុករលួយ (ACU) និងស្ថាប័នពាក់ព័ន្ធ ពិនិត្យលើឯកសារដេញថ្លៃកញ្ចប់ទី៤ ផ្លូវជាតិលេខ៤ នេះឡើងវិញ ដើម្បីលុបបំបាត់អំពើពុករលួយក្នុងក្រសួងសាធារណការ និងដឹកជញ្ជូន ដែលកំពុងបង្កព្យុះភ្លៀងដោយលោក ផេង សុខវិច្ចនូ និងបក្ខពួកតាមអំពើចិត្តសព្វថ្ងៃនេះ។

ការអះអាងនេះ ធ្វើឡើងដើម្បីជំរុញឱ្យមានវិធានការច្បាប់លើបុគ្គលដែលកំពុងប្រព្រឹត្តអំពើពុករលួយលើគម្រោងថែទាំ និងជួសជុលកំណាត់ផ្លូវជាតិលេខ៤ ដែលនឹងត្រូវប្រកាសនាពេលខាងមុខនេះ។

កញ្ចប់ទី៤ គម្រោងថែទាំផ្លូវជាតិលេខ៤ គឺចាប់ផ្តើមពីចំណុចភូមិសាស្ត្រស្រែអំបិល រហូតដល់សង្កាត់វាលរេញ ដែលមានចម្ងាយជាង ៤៣គីឡូម៉ែត្រ គឺចាប់ពីចំណុច Pk143 ទៅ Pk186 ក្រោមកញ្ចប់ថវិកាជាង ១០លានដុល្លារអាមេរិក ដែលជាខ្ចីបុលពីធនាគារពិភពលោក (World Bank) សម្រាប់ដាក់ឱ្យក្រុមហ៊ុនឯកជនដេញថ្លៃ។ គម្រោងកញ្ចប់ទី៤ នេះ ធ្លាប់ត្រូវដេញថ្លៃបានទៅលើក្រុមហ៊ុនចិនម្តងរួចមកហើយកាលពីឆ្នាំ២០២៣ ប៉ុន្តែក្រុមហ៊ុននោះបានសម្រេចបោះបង់គម្រោងនេះចោលវិញ។

យ៉ាងណាក៏ដោយ ក្រោយពីលោក ផេង សុខវិច្ចនូ និងលោក ប៊ុន វាសនា បានទទួលប្រាក់សំណូកជាង ១លានដុល្លារ ពួកគេក៏បានរៀបគម្រោងចរចាតម្លៃទៅឱ្យក្រុមហ៊ុន ប៉ូលី ចិន្តា ជាអ្នកថែទាំ និងជួសជុលកំណាត់ផ្លូវជាតិលេខ៤ នេះ ប៉ុន្តែត្រូវក្រសួងសេដ្ឋកិច្ច និងហិរញ្ញវត្ថុបដិសេធ ទើបមានការរៀបចំដាក់ដេញថ្លៃនៅឆ្នាំ២០២៤ នេះតែម្តង។

សារព័ត៌មាន The Cambodia Daily មិនអាចទាក់ទងរដ្ឋមន្ត្រីក្រសួងសាធារណការ និងដឹកជញ្ជូន លោក ប៉េង ពោធិ៍នា ដើម្បីសុំការបំភ្លឺអំពីបញ្ហានេះបាននៅឡើយទេដោយទូរសព្ទមិនចូល៕

_{Images are for reference only.Images and contents gathered automatic from google or 3rd party sources.All rights on the images and contents are with their legal original owners.}

_{Aggregated From –}

_{Source link}