Science-ko jakkale neng·nikanirangko namatna chadamberangko didichina CM agana

TURA: Re·anggipa Sonibar salo, National Science Day-ko Tura-ni Inter State Bus Terminal (ISBT)-o maniangaha aro ia tom·anio a·dokni Chief Minister Conrad K Sangma aro Meghalaya Legislative Assembly-ni Speaker Thomas A Sangma-ba dongpae bak ra·angaha.
Ia tom·anio, a·dokni Chief Minister, jinmana aganprakangengon, Science aro Technology-rangchi an·tangtangni dingtang dingtang neng·nikanirangko namatna gita chadamberangko didina nanga ine aganangaha.
“Dingtang dingtang neng·nikanirangko namatna man·na gita an·chingni chadamberangna ra·bianirangko on·na nanga aro ia ra·bianirangan uamangko, songsalna dingtang dingtang namgnirangko ra·bana dakchakaniko on·skagen,” ine Sangma aganaha.
Gama ge·anio china neng·nikanirangko man·na nangengani gimin janapatengon, “Ia neng·nikanirangko ma·sie ra·na gita an·chingni chadamberangna cholrangko on·genchimode uamang, ia neng·nikanirangko namatna cholrangko man·naba gnang aro ian an·chingni game ge·e cha·giparangna namgnirangko on·na man·gen,” ine Chief Minister aganaha.
Ra·bianirango pangchake skuloni university level-ona kingking dingtang dingtang gadangni chatro chatrirangna dakchakanirangko on·na nanga ine janapatengon, science aro mathematics susaanirangko bang·bata tangka paisarangko boksis dake on·e ong·atna nanga maina ian chadamberangna didianiko on·gen ine Chief Minister aganaha.
“India a·songara dambegipa a·song ong·a aro Meghalaya a·dokde dambebatsranga. Meghalaya a·doko songdongenggipa manderangoni bang·batan bilsi 20-na komikuenggiparangsa ong·a aro bilsi 45-na batgiparangara lak 6-na batskaa. An·chingo chadamberang bang·batani gimin chadamberangni bilrangko jakkalna gita sorkari, bang·en tangka paisarangko chamaha,” ine Chief Minister parakataha.
Chadamberangna kal·susaani aro doka dam·anirango sorkarini a·bachengatgipa dingtang dingtang program-rangni giminba ia tom·anio Chief Minister, jinmana agan-talate on·angaha.
National Education Policy (NEP) 2020-o pangchake a·dokni pilak sorkari college aro higher secondary skulrangon dingtang dingtang course-rangko man·chape science stream-ko a·bachengatgen ineba ia tom·anio a·dokni Chief Minister parakataha.
Ia tom·a matchotani ja·man a·dokni Chief Minister aro Assembly Speaker, NEHU Tura Campus-onaba re·ange, gital rikgipa Digital Planetarium-ko nokdonggae on·angaha.

[ad_1]

_{Images are for reference only.Images and contents gathered automatic from google or 3rd party sources.All rights on the images and contents are with their legal original owners.}

[ad_2]